| 2020-01-17
阅读190
刊登于 2016-09-10By 毛言地All, 女人心事, 香港小故事

因为我家姐,冇女仔敢埋我身

cc photo by flickr user Wiennat Mongkulmann

我叫R君,廿三岁仔一次拖未都拍过。

你以为因为我份人好毒所以冇拖拍?错喇。虽然未算好劲,但足球篮球排球甚至混合泳四式对我嚟讲都冇咩难度。我甚至入过港队㗎,不过后来屋企人想我专注学业我先退队咁解。你问咁一定係我好样衰?我个样当然冇方力申咁煞食,但学校有几个Modle级嘅师姐师妹对我有过意思係人所共知,冇理由个个靓女都锺意丑男挂?

不过所有约过我出嚟嘅女仔都有一个共通点:当佢地见过我家姐之后,好快就疏远咗我,包括我话对我有「过」意思嘅师姐师妹。后来其中一个师姐话比我知,由见到我家姐果一刻佢就觉得自己连一个女人都算唔上。佢话我有一个咁完美嘅家姐,肯定唔会拣一个差咁多嘅女仔做我女朋友。

无可否认我家姐真係屈机级数,无论係样定性格方面,如果你第一眼见到佢你直头觉得小龙女依个角色根本係照住我家姐写出嚟。

「洁白似雪,疏淡清致」「标格奇异,压倒群芳」

当然我家姐唔会着古装,但喺夏天单单一件白色花边背心配条浅蓝百褶裙,加埋佢白到P出嚟一样嘅皮肤,真係仙女下凡咁样。

每次同家姐出街我未见过有注意到佢嘅男人目光唔会比佢吸引住,同佢去食饭碟嘢肯定比对面果枱足料,咕噜肉啲肉可以多到泻出嚟,连叫个碟头饭都自动变炒底。

而且有一次家姐嚟大学拎返部电脑比我之后,成班嘅男同学都对我好咗好多,仲成日话搞活动一齐出去玩--不过次次都要我带埋我家姐去。我当然唔会比依班色魔得手啦,成班女同学,甚至隔离系都比佢地当中几个食过,比佢地识到我家姐仲得了。

虽然我家姐真係咁完美,但唔知係咪始终知大家係姐弟,我从来冇对佢有半点非份之想,甚至有时佢净係戴住个Bra係屋企行都好,我只会同佢讲一句:

「未沖凉就着番衫啦屌你。」

每次我都要屌佢两三次佢先肯着衫,因为佢觉得两姐弟冇咩好怕,我都唔知依啲叫天然呆定係真白痴。有时出到街食饭又搵纸巾帮我抹嘴,食过好食又将净低果半喂比我食,最经典係有次同约我出嚟个师姐睇完戏就接埋喺附近嘅家姐收工三个一齐食糖水,佢碗牛奶冰嚟到食咗啖就突然笔咗一羹喂埋嚟我度。

「P仔你试下,好好味啊。」

我相信佢依下动作再加埋果个笑容真係可以迷倒所有男人,但果刻我只係面色一白,即刻望望我个师姐--面如死灰,好似受到好大打击咁。果然当晚过后佢就Hea覆我Whatsapp,过多排仲唔理我。

「家姐,我谂你以后都係唔好喺我同女仔约会果阵出现。」今晚食完饭之后我同佢讲。

「点解啊?」

「你又靓又咁锡住我,人地自卑啊喂。」

「佢地都唔差吖。」我见佢真係好努力咁谂返佢地咩样。「而且你係我细佬,我锡你又有咩问题喎。」

我望住佢个杀死人嘅笑容,最后只可以举白旗投降,同佢讲句「当我冇讲过」。

我谂我家姐一日未死,我一日都唔洗皆意有拖拍。