| 2020-01-12
阅读174
楼市出更:裕泰兴宁做收租佬(太阳) 楼市出更:裕泰兴宁做收租佬
裕泰兴地产董事总经理罗守耀表示,最新落成的九龙城项目滙豪,23个住宅单位全部作收租用途。楼市出更:裕泰兴宁做收租佬
滙豪 近几年发展商真係愈嚟愈难做,既要面对建筑成本上升,政府又有辣招税分埋卖楼赚番嚟嘅利润,再加上一手住宅条例要揼多成百万做楼书。发展商裕泰兴地产董事总经理罗守耀(Dennis)同刘Sir讲,喺咁嘅低息环境下,觉得做「收租佬」好过,所以啱啱起好嘅九龙城住宅新盘滙豪,正式拎出市场招租,平均呎租40元。

裕泰兴Dennis话,九龙城联合道50号嘅新盘改咗名叫做滙豪,係1层1伙设计,成幢楼有23个单位,实用面积614呎,针对1家4口有细路仔响邻近九龙城或九龙塘区返学嘅家庭。项目上咗6伙嘅租金表,叫租由2.3万到5.2万元不等,估计一个月净係住宅部分收到约60万元。

物业待撤招后才放售

近呢几年裕泰兴有新楼起好都唔卖,Dennis解释话,唔係为咗避一手新例想收租够三年豁免做楼书,嗰度都係有限钱,反而係「辣招猛于虎」。因为如果发展商想卖楼,个单位市值1,500万元,要畀嗰十几个巴仙辣招税,买家唔愿意畀,但係如果想有成交,笔钱就要发展商畀,变相摊薄利润。

今时今日发展商起幢新楼嘅利润未必有10%,买卖双方都唔愿意承担畀政府呢笔惩罚性税款,所以佢哋公司宁愿收租,既可维持物业嘅单一性,又可以收到3厘回报,等政府撤招后才部署放售。

港岛项目建酒店商厦

另外,佢哋都啱啱租咗九龙太子道西都滙20个单位畀中国最大电讯设备供应商华为,讲紧一个月租金收入约50万元,而租客有权再增租单位。

同系西营盘高街嘅蔚峰99,25个单位都放紧租,平均每个单位月租2.85万元。至于旧楼收购市场,裕泰兴地产旧年都有3、4个地盘开咗斋,包括九龙城联合道84至98号。另西营盘第三街同北角春秧街嘅项目,谂住起酒店或商厦。

刘Sir